O proxecto tivo como finalidade crear solucións de almacenamento vertical para escritorios, pensadas especialmente para organizar ferramentas pequenas como alicates, pinzas ou soldadores, así como material de electrónica como compoñentes e protoboards. O obxectivo era mellorar a funcionalidade e orde nos postos de traballo, facilitando o acceso rápido aos elementos máis utilizados.
Para levar a cabo o proxecto deseñáronse esquemas de corte para estanterías modulares de tamaño compacto, concebidas para ensamblado por presión sen necesidade de cola ou parafusos. As medidas estandarizáronse arredor dun máximo aproximado de trinta centímetros de alto, vinte de ancho e dezaoito de fondo, co obxectivo de optimizar o espazo nos bancos de traballo e permitir un uso eficiente dos materiais. Para o deseño das plantillas e das tolerancias de ensamblado empregouse o software libre FreeCAD, aproveitando as súas capas gráficas para definir os patróns de corte e garantir un encaixe preciso das pezas.
O proxecto xurde dunha necesidade común entre os socios de manter organizados os postos de electrónica e montaxe, optimizando o uso da madeira mediante deseños eficientes que minimicen o desperdicio. O material principal empregado foi contrachapado de cinco milímetros, e para o corte utilizouse a gravadora láser dispoñible no local, combinando o traballo manual có software libre para planificar e xerar os cortes.
Como resultado, fabricáronse varios prototipos funcionais de estanterías que xa están en uso na asociación, facilitando a orde e o acceso rápido ao material de traballo. Ademais, os deseños están dispoñibles para que calquera socio poida replicar ou adaptar a súa propia estantería, fomentando a aprendizaxe práctica e a reutilización de coñecementos dentro do espazo de creación e fabricación da asociación.
