Galegos na FOSDEM

Desde fai 25 anos celébrase puntualmente en Bruxelas a FOSDEM, un evento que xira entorno á difusión de proxectos de código aberto (Open Source) e que reúne a máis de 8000 persoas que participan 1000 charlas do máis variado.

Este ano volveu a contar coa participación de varios desenvolvedores galegos e na Industriosa propuxémonos xuntalos para dar a coñecer o traballo que están facendo desde a nosa comunidade con impacto, en moitos casos, a nivel global. Nesta xornada participarán:

• José María Casanova (Igalia) que contará o traballo que fan para optimizar o motor de gráficos da Raspberry Pi.
• David de la Iglesia (Mozilla) que falará de Blueprint, unha ferramenta para desenvolver IA de código aberto.
• Sam Thursfield (Codethink) que explicará os procesos de testing automatizado empregados na distribucións Linux.
• Santiago Saavedra (GPUL A Coruña) que amosará o seu proxecto para desenvolver un cargador intelixente para vehículos eléctricos.
• Xabier Crespo (SC Robotics) que tratará o impacto das novas linguaxes de programación nos sistemas con menos recursos.

Esta charla terá lugar o vindeiro sábado 22 de marzo entre as 10:00 e as 13:00 no local da asociación na rúa Gregorio Espino, 38, entreplanta 3, 36205 Vigo, Pontevedra.